Protesta e të rinjve dhe studentëve në Tiranë është mbyllur vonë të shtunën, pas përplasjeve të dhunshme që lanë dhjetëra persona të lënduar dhe shkaktuan dëme të shumta materiale.
Sipas të dhënave zyrtare të përditësuara nga shërbimet shëndetësore, gjithsej 59 persona kanë kërkuar ndihmë mjekësore në spitalet e kryeqytetit.
Mes të lënduarve janë 34 pjesëtarë të Policisë së Shtetit, 21 protestues dhe katër kalimtarë të rastësishëm, përfshirë edhe një të mitur.
Dita e pestë e protestave u shoqërua me përplasje të ashpra në bulevardin kryesor dhe rrugët përreth, ku u përdorën bomba molotov, gaz lotsjellës dhe plumba gome. Gjatë trazirave, flakët përfshinë edhe disa objekte institucionale dhe biznese private.
Situata e tensionuar bëri që pranë Kryeministrisë të mobilizohej edhe reparti special RENEA, në një përpjekje për të menaxhuar gjendjen e krijuar.
Pavarësisht përplasjeve dhe numrit të lartë të të lënduarve, organizatorët kanë paralajmëruar se protesta do të vazhdojë edhe të dielën, duke hyrë kështu në ditën e gjashtë.
Sinjali – aty ku e vërteta flet para lajmit!
The post 59 të lënduar nga përplasjet në protestën në Tiranë, mes tyre 34 policë dhe një i mitur appeared first on Sinjali.
Burimi: Sinjali
